ازاي نهتم بصحتنا

 

كريم شاب صغير متعود يصحى كل يوم بدري يروح كليته وما كانش بيهتم قوي إن هو يفطر في البيت.

 ولما كان يجوع وهو في الكلية كان ممكن ياكل أي حاجة من المطاعم إللي موجودة حواليه ويشرب معاها مشروب غازي وتمام على كده.

 ولما كان يروح البيت كان ممكن ياكل أي حاجة وخلاص، واستمر على كده كل يوم لحد ما بدأ يحس بإرهاق ، فقال دول يومين وهيعدو، ولكن الموضوع تطور معاه، وفعلا التعب والإرهاق والضعف تملك جسمه. فهنا قرر إن هو يروح يكشف عند الدكتور، اللي بطبيعة الحال طلب منه شوية أشعة وتحاليل عشان يطمن عليه.

وهنا كانت الصدمة

الدكتور اتصدم من أرقام التحاليل بتاعت كريم شاب صغير عنده 20 سنة كوليسترول في الدم عالي و الضغط بتاعه مش مستقر و الأنيميا كمان عالية وكل ده وهو صغير اومال لما يكبر حيبقى عامل إيه؟ للأسف أغلبنا بيقلد كريم ومش بيهتم بصحته مع إن أهم حاجة عند الإنسان في حياته كلها هي صحته.

ربنا سبحانه وتعالى عطانا قوة بدنية، بدليل إن إحنا لو اهتميت بإنك تاكل أكل صحي واستمريت على التمرينات، حتلاقي إنه قوة ضربة إيدك ما تعادل 46 كيلو، ده وإنت شاب صغير، حتى لو أنت استمريت على كده و وصلت سن ال60 او 70 حتلاقي إن القوة ضربة إيدك بقت 39 كيلو، وده رقم كويس جدا.

 طيب طبيعي، السؤال إللي حيجي على بالنا، هو إحنا ممكن نوصل لكده إزاي؟

وقبل ما اجاوبكم على السؤال؟ خليني أسألكم كم سؤال بس تجاوبوني بصراحة.

 أول سؤال:

 لو أنت رايح مشوار مش بعيد هتمشي ولا حتركب أي وسيلة من وسائل المواصلات المتاحة، وأنا هنا مش بتكلم على الرياضة، أنا بتكلم بس على أمورك اليومية.

 تاني سؤال :

لو أنت في مكان واتعرض عليك أكلتين، أكلة عبارة عن جاتو وبسبوسة وهريسة وكل السكريات الحلوة وطبق تاني فيه فاكهة حتاكل إيه؟ أنا عارف الإجابة بس خلينا نخش في السؤال التالت.

السؤال التالت :

لو أنت تعبان وأثناء دردشتك مع أصحابك، فواحد قال لك أنا خدت الدوا ده وبقيت كويس، أو أنا باخد الفيتامين ده وحسين لي من صحتي وبقيت أفضل، هل حتسمع كلامه على طول؟ ولا حتروح للطبيب والصيدلي المختص؟

خليني أوضح لكوا نقطة، أنا هنا مش جاي أقول لك تاخد إيه من الأدوية إللي تحسن صحتك أو تعالج مرض معين، قد ما إني عايزك تفهم، صحتك شغالة إزاي، وجسمك المنظومة دي ماشية إزاي، فيها زي الموبايل إللي في إيدك، أنت بتفتحه عن طريق البصمة في الصباع، أو عن طريق الفيس أن لوك أو أي طريقة المصنع قايل لك عليها عمرك ما مسكت التليفون وهبته على الأرض وتقول هو ما بيشتغلش ليه؟ المصنع ما قالكش تعمل كده، نفس الكلام، جسمك لو فهمت منظومته شغالة إزاي؟ حتاخد منه أحسن نتيجة إن شاء الله.

طيب بي يعني إيه صحة؟

صحة هو إنك تقوم بأمورك الحياتية اليومية من مشاويرك ومهامك العادية من غير ما تحس بأي إرهاق أو تعب؟

وخليني أسألك سؤال  ؟

عايزك تفتكر أقرب واحد ليك صحته كانت كويسة وهو صغير، ولما كبر برضو ما زالت صحته كويسة، وأنا هنا ما أقصدش عمرو دياب، أنا أقصد جدك، جدك صحته أحسن منك، وأنا هنا مش بقر عليهم، ما شاء الله، ربنا يديهم الصحة وطوت العمر يارب.

ولكن جاي أقول لك إن للأسف صحتنا أغلبها وحشة جدا ومش في أحسن حالاتها.

لإن للأسف في أسباب كتيرة جدا تتخليها مش في أحسن حالاتها، وأهمها إن كتر الاختيارات إللي موجودة قدامنا إللي كلها كفيلة بإنها تجيب صحتك الأرض.

 يعني لو أنت في مشواره وحسيت إنك جعان فطبيعي إنك حتدور على حاجة تاكلها، فهتلاقي كل الخيارات إللي موجودة حواليك من محلات ومطاعم هي عبارة عن زيت ومحطوط له أكل,

 بطاطس في الزيت، اللحمة في الزيت، فراخ في الزيت، كمية زيت غير طبيعية، في حين كان جدك وجدتك أصلا عشان خاطر يجيبوا الاكل بتاعهم العادي كانوا بيبذلوا مجهود كبير وده سبحان الله كان مساعدهم في إنه يحسن صحتهم ويحافظ عليها.

طيب إزاي احافظ على صحتي؟

 أول حاجة طبيعي إنه يكون نوع الأكل، وهنا أقصد الأكل الصحي  مش لازم إن هو يكون أكل غالي، ولكن إن قيمته تكون عالية.

معدتك مش مقلب زبالة إنك ترمي فيها أكل وتسيبها هي تتعامل معاه .

هتحط فيها أكل كويس، حتلاقي صحتك، وبما إن إحنا اتكلمنا عن الأكل فلازم نتكلم على الميه، جسمك تلات أرباعه ميه وأغلبنا مش مهتم بموضوع المية، ويعني لو أنت كريم حتدي له كوبيتين مية، في حين إن جسمك محتاج متوسط من ال2 لتر ونص ل3 لتر في اليوم.

تاني حاجة وهو الحركة جسمك ربنا سبحانه وتعالى عطيه لك عشان تحركه، وكل ما اتحركتوا أكتر، كل ما تحافظ عليه أكتر، ولو أخدنا الموضوع بمثال عشان أقرب لك وجهة النظر دي إن أنت لو عندك عربيتين والإتنين نفس الفئة ونفس الموديل، وبتحافظ على الصيانات الدورية بتاعتها، بس واحدة مركونة وواحدة بتحركها كتير، حتلاقي إن العربية اللي تتحرك عمرها أربع أضعاف العربية اللي مركونة، وده لإن اللي عامل العربية مش عاملها عشان تتركن عاملها عشان تشتغل، فافتكر إن الحركة بركة.

 آخر حاجة وهو إنك تنام كويس وأصله هنا بنام كويس يعني عدد ساعات كافية من 6 ل8 ساعات متواصلين يكونوا في وقت النوم، مش تبقى مشقلب يومك وتقول أنا بنام أكتر من 8 ساعات، وللأسف جسمك محتاج إن أنت تفهمه، صح، هو بيحتاج نوم بالليل مش نوم الصبح.

وقد ما التلات خطوات تبان سهلة، ولكن التزام بهم محتاج مجهود , بس حتلاقي نتيجة مختلفة تماما في صحتك وتحسن للأفضل.

 

تعديل المقال