الأوجمنتين" (Augmentin)
بما إننا دخلنا في "موسم العطس العالمي" والبرد شديد السنة دي
، كان لازم نتكلم في موضوع "الأوجمنتين" (Augmentin) اللي بقى بيتعامل معاملة البنبوني في البيوت المصرية.
1. "أوجمنتين"
الأوجمنتين ده مضاد حيوي "ثقيل"، يعني وظيفته يدخل يفرم البكتيريا. مشاكله بتبدأ لما حضرتك يجيلك شوية "رشح وكحة وزكام" (ودول غالباً فيروسات)، فتقوم جاري على الصيدلية وخابط شريط أوجمنتين.
الحقيقة: المضاد الحيوي ملوش أي علاقة بالفيروسات، زي ما المروحة ملهاش علاقة بالبرد كده .. ده في وادي وده في وادي خالص!
2. حركة "خدت حباية وبقيت زي الفل"
دي بقى "الجريمة المتكاملة". تاخد حباية الصبح، تحس إنك بقيت حصان بالليل، تقوم موقف العلاج.
اللي بيحصل: إنت كده مش بتموت البكتيريا، إنت بتعمل لها "كورس تدريبي". البكتيريا اللي ممتش بتاخد فكرة عن الدواء وبتعمل منه نسخة "معدلة" ضد الرصاص، والمرة الجاية لما تتعب بجد، الأوجمنتين هيقف قدام البكتيريا يتفرج عليها وهي بتطلعله لسانها !
3. "بص يا حبيبي خد الحباية دي كانت فاضلة من خالتك"
المضادات الحيوية مش "تراث" بنورثه لبعض. الجرعة لازم تتوصف من دكتور، لأن الأوجمنتين بالذات ممكن يعمل حساسية أو يبهدل الجهاز الهضمي (اسهال ومغص) لو اتاخد غلط.
الخلاصة :
* عشان تقضي شتا لذيذ لو عندك برد أو إنفلونزا، اشرب سوائل دافئة، ارتاح، وخد خافض حرارة لو لزم الأمر.
* المضاد الحيوي: مبيتخدش غير بأمر الدكتور ، وبالجرعة والمواعيد اللي يقول عليها بالثانية.
* كمل الكورس للاخر: حتى لو بقيت بتنط زي الغزال، كمل الشريط عشان البكتيريا متعملش عليك حفلة المرة الجاية.
حافظ على صحتك وعلى فعالية الدواء، عشان لما نحتاجه بجد نلاقيه شغال!
وبس كده كان معكم #الدكتور_محمد_عبد_المطلب ولو احتجتم اي استفسار تواصلوا معايا مجانا
ومتنسوش تبعتوها للي بياخد المضاد غلط من صحابكم او اخواتكم
ومتنسونيش من دعواتكم