ستيرونات نور
بما إننا داخلين على مواسم العبادة واللمة وكل سنة وانتم طيبين .
فيه "تريند" كده بيظهر كل سنة مع قمر الدين والقطايف، وهو حبوب "ستيرونات نور" (Steronate Nor).
الحبوب دي بالنسبة لبنات كتير هي "المنقذ" عشان نصوم الشهر كامل،
بس الحقيقة هي "قنبلة هرمونات" محتاجين نفهم بتعمل إيه في جسمنا بعيداً عن جو الترندات.
يعني إيه "ستيرونات نور" أصلاً؟ 
بصي يا ستي، الحبوب دي فيها مادة اسمها "نوريثيستيرون"، وده هرمون صناعي بيقلد هرمون البروجسترون الطبيعي في جسمك.
وظيفته ببساطة إنه بيقول لبطانة الرحم: "اثبت مكانك، مفيش دورة هتنزل دلوقتي، إحنا لسه مش مستعدين".. فيقوم الرحم ماسك نفسه وما يرميش البطانة بتاعته.
الفوايد (اللي بتبهرنا):
* تأجيل الدورة: طبعاً دي الميزة اللي الكل بيدور عليها عشان الصيام أو العمرة.
* علاج اللخبطة: الدكاترة بيوصفوه أحياناً لو فيه نزيف شديد أو بطانة رحم مهاجرة.
الأضرار (الجانب المظلم.. أو "ليفل التنين"): 
ركزي معايا، لأنك لما بتلعبي في الهرمونات، الجسم بيرد عليكي بـ "رذالة" غير مسبوقة:
* تغير الحالة المزاجية: بتبقي "تنين مجنح" في البيت.. خناقات مع دبان وشك، وعياط على إعلان صلصة، وعصبية على أي حد يقولك "كل سنة وإنتِ طيبة".
* حبس المية: الجسم بيبقى عامل زي الإسفنجة، وشك بينور (من الورم مش من الإيمان والله)، وبتحسي إنك منفوخة ووزنك زاد فجأة.
* الصداع والدوخة: كأن فيه فرقة "حسب الله" شغالة في دماغك.
* حب الشباب: وشك ممكن يقرر يرجع مراهق تاني في ظرف يومين.
نصيحة أخوية.. بلاش نرفع الدورة في رمضان! 
يا جماعة، ربنا سبحانه وتعالى اللي فرض الصيام هو نفسه اللي "وضع" عن الحائض الصيام والصلوات.. دي رخصة ربانية،
طيب ليه نرفضها؟
* الانتقام الهرموني: الدورة اللي بتأجليها دي مش بتمشي، دي "بتحوشلك".. وأول ما تبطلي الحبوب، بتنزل عبارة عن "انتقام" (وجع أشد، كمية أكتر، ولخبطة لشهور قدام).
* التعب النفسي: بدل ما تقضي رمضان في خشوع، هتقضيه في توتر وعصبية بجد بسبب الهرمونات الصناعية.
* جسمك مش مكنة: سيبي الطبيعة تمشي زي ما ربنا خلقها، واستغلي أيام الفطر في الذكر والدعاء ومساعدة الغير.. وليكي نفس الأجر بإذن الله.
تنبيه هام جداً (بدون هزار):لو قررتي تاخديها لأي سبب طارئ، لازم استشارة دكتور.. الحبوب دي خطر جداً على:
اللي عندهم تاريخ مع جلطات.
اللي بيعانوا من مشاكل في الكبد.
الخلاصة: خليكي طبيعية، والعبادة مش بس صيام صلاة، العبادة كمان هي الرضا باللي ربنا قسمه لجسمك. 